(pahalaa bhaag: vijayaa mazuumadaar)

tuune samajhii hii nahii.n kyaa hai haqiiqat merii 
itanii aasaa.N nahii.n ai dost muhabbat merii 
itanii aasaa.N nahii.n 

jaam-o-miino.n ke sivaa aur bhii paimaane hai.n 
dard-e-dil dard-e-muhabbat bhii to maikhaane hai.n 
tuu na samajhaa hai na samajhegaa shiqaayat merii 
itanii aasaa.N nahii.n ai dost muhabbat merii 
itanii aasaa.N nahii.n 

Kvaab daulat ke Gariibii ko dikhaanewaale 
aasamaano.n pe mahal apanaa banaanewaale 
in khilauno.n se na bahalegii tabiiyat merii 
itanii aasaa.N nahii.n ai dost muhabbat merii 
itanii aasaa.N nahii.n 

sone chaa.Ndii kii tamannaa hai na resham kii talaash 
Kaak hai Kaak ye daulat kaa sunaharaa aakaash 
terii aa.Nkho.n hii me.n aabaad hai jannat merii 
itanii aasaa.N nahii.n ai dost muhabbat merii 
itanii aasaa.N nahii.n 

kaa.Npate ho.nTho.n pe ik halk-e-vafaa kii Khushabuu 
ik dha.Dakataa huaa dil, ek chamakataa aa.Nsuu 
yahii motii, yahii hiire, yahii daulat merii 
itanii aasaa.N nahii.n ai dost muhabbat merii 
itanii aasaa.N nahii.n 


(duusaraa bhaag: mahendra kapuur)

Khuubasuurat hai terii tarah shiqaayat terii 
is shiqaayat se jhalakatii hai muhabbat terii 
Khuubasuurat hai terii tarah shiqaayat terii 
Khuubasuurat hai 

pyaas le aa_ii hai saaqii tere maikhaane me.n 
Dhaal de husn kii may ruuh ke paimaane me.n 
dil ke shiishe me.n utar aa_ii hai suurat terii 
Khuubasuurat hai terii tarah shiqaayat terii 
Khuubasuurat hai 

tujh ko yuu.N dekhaa hai jis tarah chaman ko dekhe.n 
tujh ko yuu.N puujaa hai jis tarah sanam ko puuje.n 
kii hai in aa.Nkho.n ne din raat ibaadat terii 
dil ke shiishe me.n utar aa_ii hai suurat terii 
Khuubasuurat hai terii tarah shiqaayat terii 
Khuubasuurat hai 

dil vo jannat hai ki mahalo.n ke kha.N.Dahar kuchh bhii nahii.n 
daaman-e-ishq me.n laal aur gauhar kuchh bhii nahii.n 
dard daulat hai merii, dard hii daulat terii 
Khuubasuurat hai terii tarah shiqaayat terii 
Khuubasuurat hai 

mil ke ham saare zamaane ko badal sakate hai.n 
jaise phuulo.n pe chale, aag pe chal sakate hai.n 
shart bas ye hai ke mil jaae rafaakat terii 
Khuubasuurat hai terii tarah shiqaayat terii 
Khuubasuurat hai