hawaa chalii thii kuchh aisii bikhar gaye hote
rago.n me.n Kuun na hotaa to mar gaye hote

ye sard hawaa ye aawaaragii ye nii.nd kaa bojh
ham apane shahar me.n hote to ghar gaye hote

hamii.n ne rok liye apane sar pe ye ilzaam
vagaranaa shahar me.n kis kis ke sar gaye hote

hamii.n ne zaKm-e-dil-o-jaa.N chhipaa liyaa waranaa
na jaane kitano.n ke chehare utar gaye hote

sukuun-e-dil ko na is tarah tarasate ham
tere karam se jo bach kar guzar gaye hote