kabhii kitaabo.n me.n phuul rakhanaa, kabhii daraKto.n pe naam likhanaa
hame.n bhii yaad aaj tak wo nazar se harf-e-salaam likhanaa

wo chaa.Nd chehare wo bahakii baate.n sulaGate din the mahakatii raate.n
wo chhoTe chhoTe se kaaGazo.n par mohabbato.n ke payaam likhanaa

gulaab cheharo.n se dil lagaanaa wo chupake chupake nazar milaanaa
wo aarazu_o.n ke Kaab bunanaa wo qissaa-e-naa-tamaan likhanaa

ga_ii ruto.n me.n 'hasan' hamaaraa bas ek hii to ye mashaGalaa thaa
kisii ke chehare ko subaho kahanaa kisii kii zulfo.n ko shaam likhanaa